13/03/2009

Disn eine sémaine, cha y est !

Hé bé vl’là ! J’cange ‘d pâture !
Dans eine sémaine j’serai pus Tournaisienne !
Mais toudis dins min cœur, bin seur, et d’puque 48 ainnées !

Je n’peux pos dire que l’ville ‘d Leuze elle a d’jà ein beon pouant de m’ part :
quant on a eu fini l’égouttache de « no maseon », arrivés à l’rue, on a dû app’ler eul servisse des travieaux : pos d’raccordémint (les visins ouais mais pos nous !).
Eul chef i’ est daller vir eul bourguémète et c’ti-lale i’a dit qu’ch'est nous eautes qu’on deot payer les 20 mètes de busses ! Et pétêt eul plaque d’égout avec !
J’attinds sin devis à mon heomme puis j’vas li écrire au bourguémète !..

Adeon faudra mette vos bottes si vous v’nez nous vir :
dins l’ terrain ch’est core eul berdoule à causse de c’t hiver rute qui n'in finisseot pos. Après i' a pleu sus les meonts d’argile...
Et d’vant l’maseon cha s’ra bétôt eine vraie pourchelrie, les tranchées de l’guerre 14-18 !

J’n’arrête pos de r’nettier mais l’sémaine prochaine cha s’ra bin prope pou imménager.
Je n’mimbêterai pos pindant mes congés : tapissache, décapache, peinturlurache, … tous les meots in « ache » !

J’vous tins au courant pou l’pindaison de l’crémieo ... quant on ara des yards pasque on est à sec même si on est dins l'bidoule !

In attindant j’vous dis « à l’feos qui vint » !
Je n’sais pos cha s’ra quand pasque si pou mette eul téléphone et Internet i’faut creuser 20 mètes avec, on n’est pos là d’se r’vir ichi !

egoutrue

19:24 Écrit par Monique et JiPé dans Général | Lien permanent | Commentaires (0) |  Facebook |

Les commentaires sont fermés.